Concerto da Orquestra de GP na I Semana Cultural Auria Música

O Conservatorio Profesional de Música de Ourense organiza a primeira edición da súa Semana Musical, unha iniciativa que, baixo o nome de “Auria Música”, levará a música máis alá das aulas para achegala á cidadanía.
 

Este proxecto nace co obxectivo de celebrar a cultura e a educación artística, ao tempo que pon en valor o talento do alumnado e o labor docente do profesorado. Así mesmo, pretende consolidarse como unha cita anual de referencia, reforzando o vínculo entre o conservatorio e a cidade de Ourense.
 

 A música comeza en grande!

O primeiro concerto de Auria Música chega da man da nosa Orquestra de Grao Profesional, baixo a dirección de Raquel Carrera.

Unha cita que promete ser extraordinaria e que, ademais, servirá como impulso final antes dun reto moi especial: a súa participación na final do I Concurso Nacional de Orquestras de Conservatorios, o vindeiro 18 de abril en Medinaceli (Soria).

Non o perdas!